子珊戰Niki視后讓賽

無綫花旦徐子珊昨日出席洗髮水品牌Rejoice宣傳活動，以白色谷胸大露背連身裙上陣，賣大包露出胸前一點「痣」，子珊笑指一直渴望拍洗頭水廣告，在鏡頭前展現美麗奪目的秀髮，如今雖然只是出席有關活動，但已非常滿足，所以特別悉心打扮。

苦惱揀台慶戰衣

談到未到台慶夜已如此性感，那當晚會以甚麼裝束上陣？子珊笑說：「仲揀緊，今次係Vivienne
Tam特別喺英國運條裙返嚟，到時應該都係揀呢個品牌，盡量以靚為主，唔一定要性感。呢排宣傳新劇《My盛Lady》要準備好多衫，我又搵Stylist幫我襯，所以都要努力搵錢先得！」她坦言新劇會於台慶月播放，但要看觀眾反應才知會否入選角逐視后，不過她亦相信自己有機會。

對於Niki與鍾嘉欣因爭視后傳不和，子珊不諱言對此不知情：「年尾都係多呢啲新聞。（加埋你入去會好睇啲？）我唔識呢啲嘢，唔好放入去啦！畀我平穩過年，繼續工作就得。」

而擔任司儀的商台DJ何基佑，對於被指成為高層陳志雲新寵，更取代陳總寵兒的節目，何基佑作出否認：「只係轉形式啫！（話陳總鍾情肌肉男！）我又唔係好大隻，嗰次着背心返公司撞到佢。（就係咁吸引佢？）就係嗰下？佢叫我收埋佢。（佢想連你都收埋？）我有老婆，唔好講到好似發生咩事咁，佢對我嚟講係恩師。」

早前Niki被指為了和勁敵鍾嘉欣爭獎，而以低價接劇換獎，前晚她出席電台主辦的聖誕亮燈儀式時說：「我唔知自己個價算唔算低，但未落實就已經有是非，可能因為臨近台慶關係。而且我同嘉欣冇問題，佢個人好好，之前台慶亮燈個活動我哋都有傾偈，都好想有機會同佢合作！」她強調入行至今都不看重獎項，她亦十分期待能跟不同的對手合作，相當謙虛。