天然呆馬明

馬國明今晚喺無綫台慶無啦啦奪得「藝員眼中的視帝」，事後佢同「藝員眼中的視后」田蕊妮（阿田）接受訪問，被問到呆樣又出返嚟，佢好驚訝咁反問:「出返嚟咩!?」

之後馬明就話:「冇諗過有啲咁嘅嘢，返嚟先知，諗住睇下抽唔抽到車同錶，突然有個咁嘅surprise好開心，觀眾認同已經開心，同事認同更難得，投票比我嗰啲，好多都係男artist，大家都係做呢行，始終都有小小競爭，但大家都咁包容咁錫自己好開心，可能訓練班出身，大家會比多啲感情分，阿田我亦覺得佢做得好好。」

此時在旁的阿田立即扮緊張咁問:「你有冇投我?我投左你喎!o拿!你對住我即係冇啦...」馬明開始支吾以對，阿田又話:「即刻淆晒又天然呆!你係咪投比楊怡?」

問到馬明拎完呢個獎，奪真正視帝機會會唔會加大?佢話:「始終artist同觀眾投票係兩個遊戲規則。」