老蘭劉愷威

老蘭劉愷威

老蘭劉愷威靚仔媾舒淇

舒淇因與馮德倫同遊東京而被揭名花有主，但女神仍不乏追求者。據悉她常光顧位於蘭桂坊的髮型屋，一名貌似劉愷威的靚仔髮型師常向她獻殷勤。前日「老蘭劉愷威」護送整完頭的舒淇往坐車，在街頭落足嘴頭狂冧女神，愛靚仔的舒淇顯得甚嗒糖。

前日下午4時，現年36歲的舒淇在中環擺花街的Hair Culture整頭後，似因怕人認出，故戴着鴨舌帽離開，其時她的左手還戴上紅水晶、紫水晶及白水晶三條手鏈催旺人緣及愛情運，果然她身邊就出現一位貌似劉愷威、外型似張國榮生前助手Kenneth的高大有型靚仔。

據悉，這位台型十足的「老蘭劉愷威」正是該髮型屋老闆Sev的助手、初級髮型師Alfred，他一直奉舒淇為女神，每次見女神都會大獻殷勤，而且照顧周到，當日他又細心地護送舒淇到馬路邊等車，雖然舒淇素顏示人，但他仍顯得甚為着迷，不停落嘴頭與她聊天，向來鍾情靚仔的舒淇也很受落，表情多多，盡力流露可愛一面。

及後舒淇發現記者，她即溫柔輕聲地問Alfred：「對面嗰個人仲喺度影緊我哋呀？」Alfred望向記者方向，看到鏡頭後回答舒淇：「係呀，應該係。」舒淇聞言俏皮地跺地，然後大發嬌嗲說：「死啦！佢會唔會寫我哋㗎？」Alfred儍笑道：「應該唔會啩。」

由於當時中環正塞車，Alfred陪伴舒淇在熙來攘往的大街上等車等足10分鐘，二人也懶理記者鏡頭不停閒聊，你一言我一語的沉醉在溫馨浪漫的氣氛中，直至舒淇的座駕抵達，女神上車後，Alfred才回歸現實，返回髮型屋繼續工作。

其實曾被封為黃金盛女的舒淇，近年身邊一直不乏男伴，她去年與王力宏分手後，早前便與馮德倫翻撻成功，有傳二人上月初在東京旅行時，馮德倫求婚成功，後來舒淇開玩笑說訂在8月8日在馬爾代夫行禮，雖然講笑但也顯示她對結婚傳聞甚開心。本月9日馮德倫38歲生日，舒淇還在微博公開以Dear稱呼男友，似有意將戀情浮面。