全城配票

全城配票

中大「全民配票」app慘被惡搞

今屆立會選舉雖有多個民調，但唔少選民都對此有戒心，擔心意向被人用嚟做其他配票用途，搞到有巿民每遇民調都亂答，到咗噚日，中大推出嘅「全民配票」app，亦難逃被惡搞命運。

Emily噚日下晝開始在網上見到，有唔少網友喺facebook分享參與呢個全民配票，但網友嘅意向，好明顯同佢哋平日政治取向南轅北轍，例如有泛民支持者配票畀建制派，仲留言「真誠為香港，記住全城配票請投民建聯團隊，支持建設派」；又有人留言話有關投票意向，係佢「人生第一次」咁話。

泛民支持者「配票」建制派

Emily噚日所見，全城配票投票結果中，暫時建制派及人民力量「大勝」。對於配票app被惡搞，負責嘅中大政政系助理教授黃鶴回同Emily講，有留意被惡搞嘅情况，結果喺黃昏修改系統，令參與者投票後只能睇到朋友喺地區直選嘅投票意向，睇唔到整體投票數字；如果情况繼續，仲可能會將超級區議會總投票人數收起，免畀人惡搞。Emily 反問，咁咪失去app嘅原有意義？不過主辦者就話無計喎。