劉夢熊ifc

劉夢熊ifc

區家麟「考察」頂樓：IFC跳下 隨時半天吊

大爆特首梁振英黑幕的劉夢熊，昨日再出招絕地反擊。劉一日內三發聲明，除否認就廉署調查一事向港澳辦主任王光亞求援，又堅稱對梁的指控「千真萬確」，甚至公開「賭命」，單挑梁振英與他一同接受測謊，若劉無法過關，他就從416米高的國金二期（Two ifc）跳樓，「一死以謝天下」！

全國政協委員劉夢熊（Dream Bear）向特首梁振英發射「核彈」，搞到幾日嚟花生一直缺貨。Dream Bear話，如果通過唔到測謊機考驗，就會喺國金二期頂樓跳落嚟「一死以謝天下」，佢呢番偉論，真係有唔少人回應，好似無綫新聞前主播區家麟都話，以IFC嘅外形設計，就算喺IFC頂樓跳落嚟，隨時掛咗喺高層平台上，半死不活，「慘過北極熊被困浮冰」。

區家麟喺網上寫咗篇「IFC頂樓田野考察」，話尋死都要先搞清楚IFC嘅設計。佢話如果要上頂樓，首先要專人安排，搭工作電梯先上到去頂樓，又解構原來IFC高層係向上收窄，由尖頂跳落去都好可能跌落幾層下面嘅平台。想由樓頂插落地面，「需要細心選擇起跳位置，而且起始橫向動力需求較大，要有粗壯的腳瓜」。

吊船位置好 不過要考牌

無粗腳瓜，另外一招，就係喺抹窗用嘅吊船工作台跳，不過就要去職訓局讀兩日課程，經考試合格，攞到吊船操作訓練證書先上得去，所以要喺IFC頂樓死都唔係咁容易㗎。
不過，區家麟到最後都好感慨，話「玩政治，談交易，瞓身護主，卻遭用完即棄；一夜情緣，未曾深愛已無情，反轉豬肚就係屎，情何以堪」。最慘都係「我等香港人，花生都吃光，食到口臭，只有淚兩行」，真係睇到Emily都標眼淚！