大埔浸信會計劃籌款擴堂，請咗天生無四肢嘅Nick Vujicic做佈道會兼食晚宴，宣傳海報出咗嚟，講明邊個畀1萬蚊買一個「恩典」位，就可以同阿Nick坐同一圍；「喜樂」、「和平」就分別係1.5萬一圍同1萬一圍。有網民話「生活鬥士畀人當作搖錢樹」，唔滿意教會做法。
捐1萬蚊同Nick食飯
Emily噚晚睇到海報後想詢問詳情，但因過了辦公時間無人接聽。根據海報資料，晚宴舉行日期係6月4日，會喺尖沙嘴The One嘅煌府婚宴專門店舉行，據煌府資料顯示，個場最多可以擺70席，唔知埔浸想搞幾多圍。
黃之鋒質疑「賣點」
Nick Vujicic都嚟過香港，佢早前結婚，太太生咗BB。佢嘅故事感動好多人，今次佢嚟香港，有網友就質疑埔浸利用佢嚟搵錢，「學民思潮」黃之鋒喺facebook問﹕「用同阿Nick一齊坐做賣點收成萬蚊位……會唔會離譜咗啲？」有教徒話，教會擴堂募捐並冇問題，問題只係募捐嘅方式，有人話教會舉辦佈道會從來不應收費，擔心呢件事會令人反感咁講。埔浸喺其網頁話，擴堂籌款目標係3億，至今已籌得逾3000萬。
