最近因為香港電視(HKTV)拎唔到免費電視牌，但政府又唔講原因，搞到港視一班員工經常喺政總集會，幫港視拍劇嘅廖啟智(智叔)都有參與其中。
除咗工作，原來智叔家庭方面都有煩惱，今日有報道就智叔嘅大仔廖文哲，就被發現喺FB同Instgram都放上化晒濃妝同戴上假髮，作女性打扮嘅相，佢更加留言話:「I am gay」以及:「還是喜歡做女人。」
報道話有知情人講，文哲係識咗一班夾band嘅朋友就開始變，出街間唔中會畫眼線同搽唇膏前日(12號)有記者見到文哲步出沙田寓所問佢點解喺網上自認想做女人，佢話:「我...玩吓啫!」
報道指上星期一(4號)智叔一個人去睇戲，記者上去問到關於佢大仔嘅事，智叔似乎心情唔係太好，佢話:「年青人反叛係咁o架啦!佢嘅事我好清楚!」問到同老婆陳敏兒係咪用放任態度教仔，佢話:「呢個世界冇得迫，佢有自己獨立思想，每個人有唔同嘅路。」又表示對小朋友冇期望，最重要有良知，識分好壞。
其實陳敏兒曾經透露多年來因為照顧患病嘅細仔文諾，忽略咗大仔文哲同埋二仔文信，06年文諾過世之後，陳敏兒由嚴厲教導變成開放式教育，不過文哲性格似乎比以前更偏激。
